Дрэва роду Агінскага

Дрэва роду Міхала Клеафаса Агінскага

Гэты радавод - вынік аматарскай цікаўнасьці яго аўтара* да гісторыі залескай сядзібы і яе былога гаспадара М.К.Агінскага. З цягам часу вывучаньне гісторыі сядзібы і яе гаспадара (факты жыцьця Агінскага ў Залесьсі, кола яго сяброў і знаемых, яго нашчадкі, жыцьце князя да прыезду ў Залесьсе, яго юнацтва і дзяцінства і, нарэшце, продкі Агінскага) прывяло да пошукаў адказу на пытаньне - "Як і дзе ўзьнік род Агінскіх?".

* Верамейчык Сяргей - мастак па адукацыі, працаваў архітэктарам - рэстаўратарам, з 1989 года пераехаў зь Менску ў Залесьсе, дзе выкладаў ў пачатковых класах школы, кіраўнік дзіцячых студый маляваньня "Апалонік" і тэатральна - музычнай "Альтанка", навуковы супрацоўнік сядзібы Агінскіх у в.Залесьсе, працуе у галіне музейнай педагогікі.

Дадзены радавод адрозьніваецца ад традыцыйных, таму што не з'яуляецца радаводам усіх князеў Агінскіх, а прысьвечаны адной персоне - былому гаспадару Залесься Міхалу Клеафасу Агінскаму, які тут жыў 20 гадоў. Радавод быў створаны ў 1995 г. і не прэтэндуе на ўсебаковы агляд гэтай тэмы. Ен быў зроблены для выкладаньня ў залескай школе на пазакласных занятках па гісторыі і краязнаўства з мэтай адраджэньня гістарычных ведаў як пра жыцьце М.К.Агінскага, так і пра яго продкаў, яго род, які уплываў на падзеі далекай мінуўшчыны - гісторыі нашай краіны (радавод на Web-старонцы дадзены з дапаўненьнямі).

Радавод разгядае толькі "мужчынскую лінію", акая была страчана ў пач. 20 ст. (радавод "да нашых дзен" - семьі Залускіх у Англіі і Высоцкіх у Польшчы будуць дадзены ніжэй). Аўтарскія каментары і гіпотэзы дадзены іншым шрыфтам, сьпіс літаратуры па тэме - ў канцы Web-старонкі.

Князі Агінскія - старадаўні магнацкі род гербу "Агінец", прадстаўнікі якога адыгралі значную ролю у дзяржаўным, грамадска - палітычным і культурным жыцьці Беларусі, Летувы і Польшчы. Агінскім належалі землі і маёнткі на Смаленшчыне, Гузаў, Саколаў (Польшча); Еўе, Кроны, Рэтаў, Плунге (Летува); Віцэбск, Маладэчна, Ганута, Залесьсе, Бабры, Мсьціславец, Бялынічы, Слонім, Чачэрск, Пінск (Беларусь).

Існуе дзьве версіі паходжаньня роду Агінскіх, першая зь якіх сцьвярджае паходжаньне роду ад Рурыкавічаў (т.зв. казельская галіна чарнігаўскіх князёў), другая - родапачальнікамі роду з'яуляюцца смаленскія князі Глушонкі. Не абвяргаючы існаваньня першай, мы разглядаем другую.